Алматыда 44 мыңнан астам жасөспірім коронавирусқа қарсы егілді

АЛМАТЫ. ҚазАқпарат – Алматыда бір тәулік ішінде 553 адам коронавирусқа қарсы екпе алды. Оның ішінде 1-компонентін 204 адам, 2-компонентін 349 адам салдырды. Бұл туралы қалалық қоғамдық денсаулық сақтау басқармасынан мәлім етті, деп хабарлайды ҚазАқпарат тілшісі.

«Өткен жылдың 1 ақпаны мен биылғы 28 наурыз аралығында қалада 1 155 525 тұрғын вакцинаның бірінші компонентін, 1 124 171 адам екінші компонентін салдырған. Оның ішінде жасы 60-тан асқан адамдардың саны 125 067», - делінген хабарламада. Бүгінгі таңда Pfizer вакцинасымен барлығы 61 431 адам егілді. Оның ішінде 3 481 жүкті әйел, 13 539 бала емізетін ана және 44 141 жасөспірім бар. Ревакцинациядан қаланың 299 960 тұрғыны өтті. «Қазір қалада медицина мекемелерінде 136 вакцинация пункті жұмыс істейді. 175 вакцинация бригадасында 555 медицина қызметкері жұмылдырылды» - деп атап өтті Алматы қаласы қоғамдық денсаулық басқармасының баспасөз қызметі.