Ең арзан ПТР-тест – Қазақстанда

Қазақстанда коронавирусты анықтайтын ПТР-тестті (полимеразды тізбекті реакция) жүргізетін 184 зертхана болса, оның 87-сі – жекеменшік, 97-сі – мемлекеттік.

Денсаулық сақтау министрлігі Санитарлық-эпидемиологиялық бақылау комитетінің ресми өкілі Ержан Байтанаевтың айтуынша, еліміздің мемлекеттік зертханаларында COVID-19 инфекциясына тестілеудің құны қазір – 4 931 теңге. «Коронавирус инфекциясы Қазақстанда тіркелген күннен бастап, бүгінге дейін мемлекеттік лабораторияларда ПТР-тесттің құны 11 499 теңгеден кезең-кезеңімен арзандап, қазір 4 931 теңге болды. Қазіргі таңда ең арзан ПТР-тест – біздің мемлекетте. Жалпы мемлекеттік зертханаларда ПТР-сынамасын арзандату туралы ұсыныс алдымен Коронавирус инфекциясының таралуына жол бермеу жөніндегі ведомствоаралық комиссияның отырысында талқыланады, сол жиында шешім шығады», дейді Е.Байтанаев.

Ресми өкіл Қазақстанда белгілі бір санаттағы азаматтар ПТР-тестін тегін тапсыра алатынын еске салды. Атап айтқанда, ЖРВИ және пневмония сырқатының белгілері байқалған азаматтардан үйде немесе емхана мен ауруханада сынама тегін алынады. Сондай-ақ коронавирус жұқтырғандармен жақын байланыста болғандар мен ауруханаларға жоспарлы емдеуге жіберілгендер де тестті тегін тапсыра алады.

Ең арзан ПТР-тест Қазақстанда болса, ең қымбат тест – Еуропада. Тұтынушылардың еуропалық орталығына сілтеме жасаған әлемдік Туроператорлар қауымдастығы ең қымбат ПТР-тест Германияда екенін, оның құны 128-150 еуро аралығын құрайтынын жазды. Олардың хабарлауынша, ПТР-тест арзан саналатын елдер – Греция мен Италия, бұл елдерде тест бағасы 20-30 еуро тұрады. Бұл дегеніңіз теңгемен шаққанда шамамен 10-15 мың теңге аралығын құрайды.

Әзиза МҰРАТ