Жаңалықтар

Халықаралық рейспен келген 245 жолаушы карантинге жатқызылды

2020 жылғы 18 қазан 11:15
Халықаралық рейспен келген 245 жолаушы карантинге жатқызылды

НҰР-СҰЛТАН. ҚазАқпарат - Халықаралық әуе рейстермен келген Қазақстан азаматтарының 87 пайызында ПТР анықтама болды. Бұл туралы көліктегі бас мемлекеттік санитар дәрігер Садуақас Байғабылов айтты, деп хабарлайды ҚазАқпарат тілшісі.

Бас санитар дәрігердің дерегінше, 18 қазан түні 14 халықаралық әуе рейсімен 1 969 жолаушы елімізге келді. Жолаушылардың 1724-інде ПТР анықтамасы болды. Ал 245-інде анықтама болмады.

Атап айтқанда, Нұр-Сұлтан қаласына 6 рейспен келген 852 жолаушының 717-сі анықтамамен, 135-і анықтамасыз келген. Алматыға 7 рейспен 981 жолаушы жетті.

Оның ішінде 885 жолаушыда ПТР анықтама болды. Ал анықтамасыз жолаушылар саны - 96 адам.

Шымкентке 1 рейспен келген 136 жолаушының 122-сі анықтамамен, ал 14 анықтамасыз келгені анықталды.

«Қазақстан азаматтарының 87 пайызы халықаралық әуе рейстерімен ПТР анықтамамен келді. COVID-19-ға арналған ПТР анықтамасы жоқ Қазақстанның 245 азаматы Нұр-Сұлтан, Алматы және Шымкент қалаларында ПТР тесттен өту үшін екі күндік карантинге орналастырылды», - деді Сәдуақас Байғабылов ҚазАқпарат тілшісіне.