Қытайда коронавирус өршіді, мектептер жабылып, автобустар тоқтады

БЕЙЖІҢ. ҚазАқпарат – Үшінші күн қатарынан Қытайда коронавирус жұқтырғандар саны күрт артуда, деп хабарлайды ҚазАқпарат меншікті тілшісі.

Соңғы күндері Қытайда вирус жұқтырудың жергілікті жағдайлары күрт артты, олардың басым бөлігі – симптомсыз. Жергілікті БАҚ мәліметінше, елде вирусты жұқтырудың тәуліктік жағдайлары 2020 жылдың басында тіркелген көрсеткіштен асады. COVID-19 жұқтыру ошақтары кем дегенде 17 провинция, автономиялық аудан мен орталыққа бағынатын қалада орналасқан. Олардың қатарында Бейжің, Шанхай және Гуанчжоу мегаполистері бар. 9 миллион тұрғыны бар Чанчунь қаласында (Цзилинь солтүстік-шығыс провинциясының әкімшілік орталығы) толық оқшаулау режимі енгізілді. Барлық білім беру мекемелері, сауда орындары (супермаркеттердің шектеулі саны мен дәріханалар жұмысын жалғастырады) мен қоғамдық тамақтану орындары жабылып, қалалық қоғамдық көлік жұмысы толығымен тоқтады. Жаппай коронавирусқа тест тапсырудың екінші кезеңі басталды. Қытайдың денсаулық сақтау істері жөніндегі мемлекеттік комитеттің деректеріне сай, өткен тәулікте Қытайда коронавирус жұқтырудың 476 жағдайы, 1 048 симптомсыз жағдай тіркелген.