Жаңалықтар

Нью-Йорк пандемияның аяқталуын үлкен концертпен атап өтеді

2021 жылғы 8 маусым 17:09
Нью-Йорк пандемияның аяқталуын үлкен концертпен атап өтеді

НЬЮ-ЙОРК. ҚазАқпарат – Әлемде коронавирус пандемиясының нақты аяқталу күнін болжау қиын, дегенмен Нью-Йорк билігі тамыз айында аяқталады деп отыр. Дәл сол кезде мэр Билл де Блазио орталық саябақта мегаполистің қалыпты өмірге оралуына байланысты концерт өткізуді ұсынды, деп хабарлайды ҚазАқпарат Reuters агенттігіне сілтеме жасап.

Вакцина алғандардың саны өсіп, вирус азайып келе жатыр. Соған байланысты Нью-Йорк билігі қалада жанды музыкамен іс-шара өткізуді ұйғарды. Іс-шара бір аптаға жалғасады деп күтілуде. «Бұл Нью-Йорк үшін таңғажайып, ұмытылмас апта болады», - деді қала әкімі баспасөз мәслихатында. Де Блазио концерттің нақты күнін, сондай-ақ онда өнер көрсететіндерді жарияламады. Дегенмен New York Times іс-шараны 21 тамызда Орталық саябақта өткізу жоспарланған деп мәлім етті. Музыка индустриясының аты аңызға айналған майталманы Клайв Дэвис барлық жұлдыз өнер көрсететін үлкен іс-шараны жүргізеді. Таймс концертте вакцина алған және вакцина алмаған көрермендерге де орын берілетінін және билеттердің шамамен 70%-ы вакцина алған музыка әуесқойларына сатылатынын айтты. Айта кету керек, көшелер, мейрамханалар мен саябақтарда қайта тіршілік лебі сезіледі. Covid-19 салдарынан ұзақ айлар бойы бәрі қаңырап қалған еді. Дүйсенбіде де Блазионың айтуынша, Нью-Йоркте пандемия басталғаннан бері ПТР тестілерінің ең төменгі деңгейі тіркелді - 0,71%. Қалада шамамен 4,5 миллион адам коронавирус вакцинасының кем дегенде бір дозасын алды. Нью-Йорк губернаторы Эндрю Куомо дүйсенбіде жеке баспасөз мәслихатында штат COVID-19-ға қатысты қалған шектеулердің көпшілігін алып тастайды деді. Бұл кезде тұрғындардың 70%-ы вакцинаның кем дегенде бір дозасын алуы тиіс, бұл қазіргі деңгейден 1,4% -ға аз.