Жаңалықтар

Шығыс Қазақстан облысында 10 мыңға жуық бала Pfizer вакцинасын алды

2021 жылғы 26 қараша 13:55
Шығыс Қазақстан облысында 10 мыңға жуық бала Pfizer вакцинасын алды

ӨСКЕМЕН. ҚазАқпарат – Шығыс Қазақстан облысында 10 мыңға жуық бала Pfizer вакцинасын салдырды, деп хабарлайды ҚазАқпарат тілшісі.

ШҚО Денсаулық сақтау басқармасы баспасөз қызметінің мәліметіне сүйенсек, қараша айының басында облыстың медициналық мекемелеріне аталған екпенің 35 100 дозасы келіп түскен. Бүгінгі таңда тиісті санаттағы адамдарды иммундау жұмыстары қарқынды жүргізіліп жатыр. «Өңір бойынша коронавирусқа қарсы америкалық Pfizer вакцинасын алғандар саны күн сайын артып келеді. Нақты айтқанда, қарашаның 16-ынан бастап 12-18 жас аралығындағы 9941 бала екпе салдырған. Балаларды вакциналау тек ата-анасының жазбаша рұқсатымен жүзеге асырылуда. Сондай-ақ жүкті және бала емізетін 972 әйел егілді», - делінген хабарламада. Естеріңізге сала кетсек, осыған дейін Шығыс Қазақстанда коронавирус стационарлары 17% жүктелгенін хабарлаған болатынбыз.