Түркістан облысына Спутник Лайт вакцинасының 25 мың дозасы жеткізілді

ТҮРКІСТАН. ҚазАқпарат - Түркістан облысына 25 000 доза көлемінде «Спутник Лайт» векторлық вакцинасы жеткізілді, деп хабарлайды ҚазАқпарат тілшісі.

«Спутник Лайт» — ревакцинация үшін қолданылатын бір компонентті вакцина. Ол Ресейде әзірленген. Айта кетейік, облыста 1046428 адам вакцинаның бірінші құрамын салдыруға ниет білдірген. Екінші компонентін 1037716 адам қабылдаған. 90972 тұрғын ревакцинация алған. Қазір облыс аумағында 150 екпе қабылдау бекеті жұмыс істеп жатыр. Бүгінде облыс «сары» аймақта тұр. Өңірде 22 қаңтарда COVID-19 індетінің 135 жағдайы тіркелді. Тәуліктік өсім - 0.77%. Қазір инфекциялық стационарларда барлығы 900 орын бар. Мұнда 279 науқас ем қабылдап жатыр. Жалпы пандемия белең алғалы КВИ-дің 17 531 жағдайы анықталды. Сондай-ақ бүгінге дейін 1 202 975 ПТР сынамасы алынған. Ал соңғы тәулікте зертханаларда 2152 адам тексерілді.